Aji Sukor Nek Jadi Raje

Nek nua-nua bekaca, ukor duluk bajuk di badan
Dirik lah budu, ngaku hibat punya kemampuan
Asal nek nguap, kenak kek inde kenak kek uman
Aji Sukor nek nyalon raje, asa benar asa ukan

Masalah pulitik, masalah birokrat dek paham mula
Badan lah ungkor-ungkor, lah mulai gatok lah mulai tua
Mana bute urop, dek pacak nulis dek pacak maca
Ancok gawi ne Ji, kalok badan dek sadar kek rupa

Yang kek diandel, igik sang cuma selejok, duit tige sumoet
Dek cukop kemanalah, meli spandok ge tekarat kiret
Tambeh tabiat pok, mana medit agik pelet
Jangen ngeleteh badan, along bekebun tanem lah karet

Urang mudel Aji Sukor, dek cucok men jadi raje
Dek ngerawat pudong, tesinggong dikit merdas ngeruce
Sikit-sikit madeh garang, kiyun kene nabuh dade
Apa kerenyek, dek ngerawat  haram diraop gale

Biar lah tuan aji,  begaya mudek, agik begatel ulik
Nengong mentinak cikar, lah mulai nya tekusik-kusik
Asak lah tepudeng, dek ngerawat ayak dek ngerawat adik
Ati tengah kasmaran, apa dipintak nya berik

Men masalah mentinak, mimang jagok, susah dilawan
Rayuan e maot, asak lah nakser, dek peduli kek  adik kawan
Segale cara dipakai, dek pacak terus terang, nya pakai umpan
Ditulak mentinak, tahan bedukun, pakai ilmu  baye seluman

Negeri lah ancok tambeh ancok, kalok Aji Sukor sampai tepileh
Status mimang lah aji, tapi cuma sungkok yang puteh
Men lah tau lubang ular, jangen ditampek jangen dipereh
Kalok agik ikak pileh lah, Amang Ikak beguyur pindeh.

kelekaklukok, 07072012