Safari Romadon

Malem jemahat mari, raje kek wakel e gi ke kampong amang
Safari romadon, kelilen bangkek belitong setiap petang
Madeh muka kek rakyat, setelah tepileh jadi pemenang
Dateng ke misjid, mawek rombongan macem pasukan serdadu perang

Dateng bedue, keliat akor nak inde penganten baru
Merik petuah, supaya bangkek belitong lebih maju
Rakyat akan aman kalok sesama pemimpen kuat  besatu
Bida pendapet, bida mileh waktu pemilu,  jangen agik  dibuat lagu

Nengong ikak akor macem ne, ukan maen seneng e ati
Rasa-rasa e, mimang dek rugi mileh ikak jadi datuk ini  negri
Bejalen sama-sama, salen menginget salen mengisi
Merik cuntoh bagus, tampak kumpak tampak serasi

Tapi biase e, pasangan baru, mimang nak ya lah mula
Dek kek nek beselak, biar sesaat apa agik semasa
Merdas bekelon, begagit-gagit asak lah mencelak igik mata
Dek ngerawat pudong, asak ade  renyek, dek peduli kek mentua

Lah setaon due taon  bejalen, kita sama-sama jadi saksi
Apa agik masa jabatan lah kek abis, raje kek wakel e mulai ngerusi
Bejalen lah dek sama-sama agik, sikok duluk sikok dudi
Masalah kecit jadi besak, raje kek wakel lah pecah kongsi

Biar serumah dek suah betegur, macem  asuk bejik kek kerak
Mulai pisah ranjang, sikok tiduk di kamar sikok di gladak
Kiyun kene ngejiat kawan, setempoh beradep merdas ngeruak
Janji seidup semati, nyata-nyata e cuma bebulek ketak

Kongsi pulitik mimang dek suah  jadi abadi
Asak sikok dapet besak, sikok dapet kecit, pasti pecah muli
Bagi asel dek sama, lah mulai beiri dengki
Kalok raje lah salen cakar, rakyat yang jadi rugi

Pesen Amang, dek perlu ngampuk madeh ikak salen akor
Jalen bai apa ade e, rakyat pacak nengong, pacak ngukor
Safari romadon ukan kartu rimi ukan papen cator
Salah gawi, sehibat ilmu, pacak-pacak jadi luntor. (*)

              kelekaklukok, 28072012