Ngidup Ayem

Tingkah  Aji Sukor nak inde urang gile
Utang selilet pinggang, mudel usaha lah abis gale
Nanem mudel ngidup ayem, sekali rugi dek duge-duge
Ayem abis tejual, ninggal utang kek para tauke

Saking kerenyek ngadu naseb, Aji Sukor berandai-andai
Dek tanggong-tanggong, segale kebun karet, abis nya gadai
Besak mudel yang dikeluar, untong besak nek digapai
Dek apa cenoh, usaha merugi, Aji Sukor ngicau tai

Kerinah punya kerinah, dek cuma Aji Sukor benaseb burok
Setali tige uang, yang Ayak Sulai ge jatuh sedudok
Ayem sekandang lom tejual, lah matok kaki pacak bekukok
Pemaken dek tebeli agik, yang utang beguyur numpok

Lah keputen akal,urang bedue ya ngator siasat
Ngumpol kawan senaseb, ramai-ramai gi ke sungailiat
Mintak tulong kek raje, apa ade cara untok selamat
Jangen cuma bekenek jadi pajabat, tapi rakyat dibiar sekarat

Sampai di sungailiat, yang raje ge ngakuk bingung
Masalah yang dipiker kecit, dek nya kira sebesak gunung
Bejam-jam dibahas, masalah pukok tekatung-katung
Raje merik petuah, minggu adep akan disambung

Amang Ikak yang ikot hadir ketabe surang
Gelik ati kek cara bepiker segale urang
Tingkah raje, tingkah rakyat setali tige uang
Rakyat mintak tulong, yang raje bepiker ngambang

Pejabat terkaet pon keliat e dek paham kek masalah
Cuma pacak beteori, praktek di lapangan dek tau apa lah
Apa nya ucap, apa nya sampai jadi dek searah
Ne bukti pejabat yang dek suah turon ke bawah

Nengong cara ikak, tauke sekaban ya ketabe ngakak
Lah pacak nya ukor, ilmu pejabat cuma sepangkak
Sekuwayok ngakal, untong selanget, dipadeh rugi besak
Kalok nak ne cerita, rakyat kecit merugi ketak.(*)