Nek Tau Kek Malu

Jadi urang nek tau kek reti malu
Mun ukan punya dirik jen cuma pacak ngaku
Menteng-menteng lah merasa mampu
Punya urang, nek direbut sanggup beradu

Waktu lom betajik, dek suah nek retak
Lah jadi kerajaan besak icak-icak nek ngertak
Dek angen dek ribut, nya nyungap dek sepinak
Nek malu muah jadi urang, jangen nek sok pacak

Duit bemilyar-milyar lah disiap demi gengsi
Pengacara hibat tinggal dipanggil kapan bai
Asak pacak direbut, segale cara dipakai muli
Amang  jadi curiga, ada gerangan apa di balik kuali

Barang yang nek direbut ge, dek renyek mereh dirik
Yang ikak pacak-pacak nyuson cara nyuson taktik
Propaganda dibuat seulah-ulah ikak jadi memanik
Dek tau aben, ujong-ujong e ade yang disemunyik

Nguros Bangkek Belitong ge, lom mengkeruan
Apa agik nek nguros pulau jauh di seberang lautan
Besak igek lagak, dek sesuai kuleh dek sesuai pendapetan
Ngarep intan di lembeh gunung, ilang mutiara dalem lautan

Kerinah yang mana adelah, jangen macem urang serakah
Men kek rejeki dirik, pasti dek kek kemana rak lah
Serade gawi perlu dipiker, jangen sampai betindak salah
Jangen hanya demi harge diri, ikak betindak ngelawan arah

Selesai bagus-bagus, jangan sampai dicap tukang rampes
Dek apa bet agik, men badan lah dianggep jadi ampes
Kiyun kene dek dianggep urang, untong-untong dek kena kedes
Jiat dipandang urang, ibarat bediri di ates rangges

Men mimang lah ukan rejeki diri, jangen seukeng-ukeng
Dek de begune men idup di dunie nek kereng-kereng
Biar kita ngalah, urang maken daging, kita maken kaleng
Dek banyek ngadep masalah, idup jadi teneng.

 kelekaklukok, 06102012