Pekasem Sapi

Pekasem Sapi

Oleh: Ichsan Mokoginta Dasin

SUDEH mace kuran, dek minga Aji Sukor ngeniber e. Nak inde bungkus belacin nya ngulah kuran yang baru nya beli pagi di. Kantet selejok, kena nyangkot sliting sual e. Nuleh nya suat, ngulek nya mereh kuran yang nya tiber tadi e.

"Gak ulak nya peter ngantet ikak sekaban ya," sumpah Aji Sukor sambil  ngenuden gambar urang yang di kuran. Cuh... Nya ngeludeh.

"Boh... Apa asa muka, men diludeh kek aek yok tua ne." Lah udeh nya ngeludeh gambar muka urang yang di kuran di,  ngumbas Aji Sukor lari, mereh Amang Ikak tabeh e.

Bujang Kelincot, lah dek kawa agik nahan ketabe. Rupa e, lah kek sepagi ne, budak sikok ya ngintai pulah Aji Sukor.

"Tua-tua ngerajan dek nyemenggah gale," ngisel nya ketabe surang, setengah lumpat Bujang Kelincot ngenyusol Aji Sukor kumah Amang Ikak nu.

Sampai di umah Amang Ikak, lah ngisel ulak Bujang Kelincot ketabe. Gelik ati e nenger kisah urang tua due ikok ya. Mangan nunjei nya bejalen, semunyik nya baweh umah.

"Sapa agik boh nek kek kita pecaya ne, Mang. Urang alem malen guyur lah, apa agik yang setengah alem," kedenger suara Aji Sukor dari dalem umah.

"Sapa ge men nengong duit, ijeu mata e Ji. Dek urang dek dirik. Nama ge duit. Ibarat ikan asen, kucen budu belilu men lah gak agik majuh ikan asen," jawab Amang Ikak sambil ngulong temaku garut e.

"Dek kena-kena men nak ya Mang. Kalok urang alem lah sampai sebejat ya tingkah pulah e."

"Yang alem ya tupeng e bai nya Ji. Ibarat pok ne lah. Nama mimang lah Aji, tapi tingkah e agik lah dek mengkeruan," sindir Amang Ikak.

Aji Sukor salah tingkah, keriya lom baran. Pon dek e, ade piker nek ngemanggem kepala kawan.

"Ade benar lah kata pok ya, Mang. Tapi jangen ko kena sasaran e. Dek nganta men kena sindiri beradep ne," prutes Aji Sukor. Lis-lis mata e, dek seneng uman e kek sindir Amang Ikak di.

"Tapi sebalet e ulak, men tingkah mimang dek benar, dimana tempet nak ya lah perangai. Cuma perumong yang bagus, tingkah pulah nak inde raje belis, ngerampok guyurlah," sambong Aji Sukor.

"Yang nama pekasem busok, lama-lama pasti nguap nya Ji," bales Amang Ikak.