Aek Budu

PULANG Kongnyan Mat Tahe begaduh saket perot. Suat-suat masok kakos, dek renti begaduh saket.

Munah binen e, merdas ngerusi. Aek abis kek aek, yang kaen sarong kutor lah ade selejok. Kena tai keciret Mat Tahe inde e.

"Majuh dek sadar kek alam, apa di surong urang lasek gale. Ade mula kuleh mon kedangang igek jadi urang," nak peter suara Munah, meranen kek laki e.

Mat Tahe dek ngemuret. Dek nyaot puteh dek nyaot item. Ngedem tuan e dalem kakos. Yang kepala lunteng-lunteng, badan asa rebeh rimpa.

"Bussssh....proooot!"  Tai jual Mat Tahe ngelorot. Campor aek inde bunyi e di. Lah ngaroh ulak Munah.

"Nua-nua Mat... Nua-nua. Gelane badan tua ne kek ngenyiram tai ikak ya. Belambur bunyi e di."

Mat Tahe dek retak lah, agik ngeden tuan e. "Prooot... Preeet...!"

"Boh nganta men asa e," Mat Tahe becakep surang.

Rasa agak nganta, Mat Tahe keluar dari kakos. Lom sempurna aben nya nekep lawang kakos, lah disambut Munah kek karoh ulak.

"Mati lah Mat, Mat...Nak ya macem tai nya muncak mancis. Majuh apa nya ikak di Mat," seruwek Munah, Mat Tahe lah lempos, lah ngenuje umah Bujang Kelincot uman e.

Pas liwat adep umah Aji Sukor, mendadak Mat Tahe berenti.
"Ya uman kasot e. Nampel di ne ulak budak sikok ya,"  ngerunem Mat Tahe.

Bare lah nya ngenat tanggek, nyengol Bujang Kelincot, yang Aji Sukor, nutol dari punggong.

"Nampek ne ulak ke di Jang, baran benar ati ko kek ke ne," menceleng mata Mat Tahe, sambil teken pinggang.

Nengong mata Mat Tahe la mirah, ngerisen Bujang Kelincot. Dek minga nya melencat, belindong nampek punggong Aji Sukor.

"Ngapa-ngapa nya ikak due ne, macem asek kek kucen nek bekantet ne," tanyan Aji Sukor hiran.

"Teliwat budak ya Ji, Meluntang urang tua gawi e." Ngireng Mat Tahe.

"Meluntang nak mana kisah ulak," agik hiran Aji Sukor. "Nak mana nya pon kisah e," sambong Aji Sukor.

"Bujang ne teh, Ji. Tadi kamen namu kumah Cen Akiong. Bujang mintak aek budu kek Cen Akiong, katanya aek ya nyamen, sihat badan kalok minom aek budu," Mat Tahe ngisah perihal namu dumih Cen Asiong.

"Yang ko ne dek tae kisah mula, sutek kek nudus, paet-paet manes asa e. Abis due gelas, kepala lunteng-lunteng. Dek lama sudeh ya, merdas nek biyek," kisah Mat Tahe.

"Mat, Mat. Uman e bi tua pok ne. Tapi dek berakal. Cuman kek diakal budak lah pok ne Mat," mangan ngerngem Aji Sukor berumong, ngingal nya ke punggong, Bujang Kelincot lah lempos.

"Aek apa pon nya Ji, yang ko minom dumih Cen Akiong tadi e pon," tanyan Mat Tahe.

"Ya lah nduk arek kata urang e. Budak kinek nyebut e aek budu. Tae dek pok..." Gaaar.... Aji Sukor nekep lawang. Mat Tahe tinggal tengangak.

"Budu, budu gawi ne. Sial ke ya Jang. Lak pok Jang asak setempoh, ko ngerkah kepala pok ya," kesel ati Mat Tahe dek tae madeh. Lempos ge nya pulang. (Amang Ikak)