Aek Tambeh Keroh

PAGI ya Ayak Sulai pulang nyelik bubu. Cuman dapet due ikok ikan tepalak. Men diitong ngeluner, dek muah. Tapi jadilah, musem harge ikan mahal ayem mahal ne, ungang ge, bet lah kek ditutok belacin cerai.

"Suat ne ngesat ikan  lah dek nguleh agik. Sungai la ancok tais, kepoh gelapet aek e. Lah nak inde tatong," Ayak Sulai becakep surang. Sungot e ngerimot-ngerimot sambil mucak rukok garut kek lideh e.

Baru lah nya nek ngenat tanggek umah, tekejut tuan e. Dari ujong kampong Ayak Sulai nengong ade due mubil teruk penoh kek urang. Urang dalem teruk  sambil karoh-karoh ngacong perungkuk. Suara karoh e nak inde suara peter, garang uman e, nek nya munoh. Sampai-sampai dek pati kedenger agik kek bunyi siong mubil lew-lew yang tukang kawal e.

"Lebem...Nek ngeruso kemana ulak urang sekaban ya," dek minga Ayak Sulai ngelepas bubu e. Ngerutop nya lumpat, ngelapor kek Amang Ikak inde e.

"Ancok Mang, gawat Mang...!" Ngep-ngep nyawa Ayak Sulai, te singgak-singgek nya ngator nafas.

"Ade apa ge Lai...Lumpat ketakot macem diusek Raje Mawang ne...?" Amang Ikak  baru udeh maken, simpet kaen dek bebajuk, peloh e nak dimandik.

"Ade urang nek dimo Mang. Dek bulek kata ko mari. Gara-gara aek keroh, urang dek pacak ngesat ikan, aher e nek ngeruso. Mati gawi ne Mang. Ade due teruk, dikawal mubil lew-lew," gupuh Ayak Sulai merik tau Amang Ikak.

Lom sempet Amang Ikak ganti bajuk, teruk berenti pas adep lamen umah. Yang mubil lew-lew agak ke pinggir, berenti baweh tutor atep.

"Kamen nek setempoh kek Amang Ikak, Raje Kelekak, yang mana urang e," kata kepala ganak rumbongan. Kepala e butak, agak bujei sikit, macem bueh binjei.

"Ade apa Yak.. Dek tau ujong pangkal ngumong nek reng-reng ne. Sabar luk, jangen mawak api ne...!" Amang Ikak dek kalah garang. Madeh dade e, teken pinggang ulak udeh nya e.

"Kemen ne nek ngadu masalah aek sesungai-sungai lah nak inde tatong ne. Mana, yo keluar luk  yang nama Amang Ikak ya. Sebagai Raje Amang Ikak nek betanggong jawab," bales urang kepala butak sambil maen kumis e.

Amang Ikak tampak teneng, yang Ayak Sulai lah mengkejer. Dek sadar-sadar, nya pon kemeh beng seluar.

"Dek usah dicarik agik, ko ne lah yang nama Amang Ikak. Ikak sekaban ne nek macem mana sudeh e, nek maen secara alos apa nek maen kasar," Amang Ikak mucak simpet kaen e, lah mulai nek ngeluar jurus.

 Urang kepala butak tekejut. Mundurnya selangkah, bebisik nya kek kawan e.

"Mon di baleho waktu nyalon duluk ukan ge ne urang e. Bida wajah e, di baleho macem ABG, yang ne muka e lah keripot. Nak inde tapai tumpak ke dinden," bisik kepala butak igik binjei kek kawan e.

"Ngapa bisik-bisik, takot kek jurus Angpau Mace Dek Bekitab Amang ne ok," Amang Ikak turon ke tanah.

Rumbongan kepala butak mundur, ketakot uge inde e.

"Kan nak ya Mang.   Sabar luk Mang, dek nyelesai masalah men nak ne."

"Kepaleng ikak lah nantang, yo men nek ngeroh aek. Biar tambeh keroh."

"Maaf Mang, dek kenak inde e men kamen mudek ne ngaladen urangtua. Kamen kira tadi Amang ne agik ABG jadi kamen mawak alam garang. Tau-tau e jauh bida kek yang di baliho waktu nyalon duluk, kamen kira Raje e agik mudek, tau-tau lah tua gatok," rising-rising si butak ngumong.

Dikata tua gatok urangtua ya maraning rupa e. Lumpat nya ke pinggir gi nyabut tiang perempai. Begebang urang sekaban di lumpat. Masalah pon dek selesai. Aek tambeh keroh. (*)

kelekaklukok, 19012013