Sekak Bidak

Ayak Sulai temuncat mancet kek sapu sutik. Cak-cak jadi gitar, yang katanya e. Badan kadang-kadang dimiring, yang langkah kadang maju kadang mundur. Kepala unggek-unggek.  Jari tangen e, tekruwet-kruwet ngais biding penyapu. Ngikot gaya Rhoma Irama ngemaen melodi gitar, yang kata nya e.

Wak Munah binen e, sama ye lah. Merdas betiter kek sarede perabut. Dek puas piren, gincing nya titer. Asa agik kurang nyaren, imber ulik nya buat gendang.

"Hooooiii...Lah gile ok...!!!," karoh Amang Ikak dari lamen umah.

Dari dalem umah, titer meniter perabut dek de cager aben kek berenti. Ayak Sulai agik muncat-mancet, dek puas ke dapuk, lumpat nya ke sambik. Wak Munah nak ya uge, berape laki e gile nyanyi sambil bedincak, Wak Munah lebih gile. dek sadar-sadar tali kutang e lah kek tebretas gara-gara nua igek betabuh kek imber.

Ngerasa karoh nya tadi dek diretak, Amang Ikak ngenat kumah. Ambik nya kayu, dititer nya lawang.

"Lah kek ngerib ari ne Yaaaak...Ngundang serade Raje Belis. Terumpak dimana nya ikak bedue ne...!!!" Lah mangan kesel ati Amang Ikak.

Tekancat Ayak Sulai nenger karoh Amang Ikak di. Dek minga nya muang sapu. Wak Munah ngerising-rising, malu inde e. Kelecup nya masok pelempeng, dek aci keluar agik.

"Menteng-menteng sari mari setempoh kek Rhoma Irama, pacak nak ne gile e. Tekaroh kerik, betiter kek serade imber, ngantol urang nek istirahat," ngeruce Amang Ikak.

"Maaf Mang... Maklom ko ne penggemar berat Rhoma Irama. Dek puas lom asa e. Setempoh mari suat umun lah. Gara-gara Atok Kulop sial ya..." Melingos Ayak Sulai sambil muang muka.

"Ngapa pacak ngenyalah Atok Kulop ulak ne. Jangen nek ngemanjeng tali kelambu gawi ne Yak...!!!" Selidik Amang Ikak.

"Macem ne Mang. Mari e lah bejanji. Rhoma Irama tiduk di umah ko ne. Yok ati ko ne, biar pacak men bekisah lama. Tau-tau dek sesuai kek janji, Atok Kulop mawak Rhoma Irama pulang. Saket ati ne Mang,"  Ayak Sulai keliat e milos. Nak inde budak kecit, singgek-singgek nya benyawe, ancok muka e.

"Cuman hal macem ya ge nek ngambik ati. Yo deng-deng lah, dek kenak inde e, mun tua-tua nanges, macem budak kecit bai pok ne," nengong Ayak Sulai lah mulai nek nanges, Amang Ikak nyube ngucuk e.

"Ko ne penggemar berat Rhoma nya Mang. Jaman agik ade misbar luk e, sanggup tige runde ko nunton filem e. Lah mulai jaman raje bekitok luk ko nunggun setempoh kek nya, sekali setempoh suat umun lah," lah mulai ngerebes aek mata Ayak Sulai.

Nengong Ayak Sulai lah tesinggek-singgek nanges, Amang Ikak ngaru kepala, serbe salah uman e.

"Maka e ko ne nek bejuang supaya Rhoma jadi presiden. Men nya lah jadi presiden, merdas nunton filem ulak kita Mang..." Sambong Ayak Sulai, sambil ngelap aek mata e kek ujong bajuk e.

"Macem mana cara bepiker pok ne Yak... Dek de urang laen agik ge kek dipileh. Apa nya kepacak Rhoma ya, jangen sebasing mun nek mileh raje," prutes Amang Ikak.

"Hay lah Amang ne... Pacak ngumong bai. Sebelum tepileh jadi Raje Kelekak, Amang duluk ge dek tau reti kek apa lah. Gawi Amang merdes bebuat kek bubu,  muat lipang karong, sela-sela e belapun. Lak luk ngata urang ya, ngaca nua-nua, macem mana Amang dulu sebelum jadi Raje," sengang Ayak Sulai, ngumbas nya berangket gi ngambik temaku gulong e di dapuk nu.

Kena sekak bidak kek Ayak Sulai, Amang Ikak dek ngemurik. Masem muka e, abis mudel nek beteco. Tulak Ayak Sulai gi ke dapuk, lempos nya pulang, dek madeh aben. (*)

Kelekaklukok 26012013