Lagu Telok Bayur

Lah lama Amang dek nenger lagu telok bayur
Lagu taon 70 an waktu amang agik bau kencur
Idup agik susah, urangtua agik nganggur
Maken nyamen dek suah,  beras e campur bulgur

Teringet masa susah, banyek besukor kek Maha Kuasa
Susah Allahu Robbi, dek pacak mida mana kaki mana kepala
Sari maken sari dek, Amang Ikak ne lah ngerasa
Sekarang lah agak nyamen, jangen nempoh agik idup sara

Cerita soal lagu telok bayur, teringet uge kek langkah walikuta
Dek kawa pengkal banyek maksiat, telok bayur nek dibuat rata
Banyek mudorat e, lebih-lebih nek ngadep bulan puasa
Along muat amal, berenti duluk nyambong pipa

Tikad walikuta ne, dek segale urang yang suka
Ade yang ngenenteng, sampai tecelalek igik mata
Sutek nek katanya lah, urang nek bebuat bagus nya dek rela
Hiran Amang ne, entah macem mana jadi manusia

Yang ngenyukop rukon e ulak, nuduh ade muatan pulitik
Telok Bayur dibungkar karena ade yang kek diambik
Pemimpen yang nek numpes maksiat dianggep licik
Benar salah lah dek jelas agik, tande dunie lah tebalik

Berik dek diberik, musoh e, dibungkar abis
Bawek alam dek ngerawat,  sapanegeh urang ngata dirik belis
Yang penten gawe ne benar, biar ilang segale najis
Telok bayur diirubuh, mudah-mudahan urang jadi memanyis

Nduk-nduk sekaban ya jangen pati diberik aek
Men diulor-ulor, timbang ini timbang itu, dek kawa nya manjek
Pak Kapolda pon, lah ngenukung, lah merek
Men dek beranen lah ngemungker e, mimang lah kajek

Hikayat  Amang Ikak ne, dek bemaksod ngemila sikok-sikok
Yang salah dikata salah, yang benar nek diperaok
Dibiar lama-lama, generasi mudek semaken ancok
Beranen bebuat benar, ne baru nama e pemimpen jagok (*)

kelekaklukok, 14072012