Ngakal Urang

Aji Sukor kek Ayak Sulai makai bajuk baru
Silak rambut nyeriwing, siok bedesiu betalu-talu
Malem Jemahat lah bejanji mereh raje di Sungailiat nu
Setel macem pejabat, tapi sayeng dek nyematu

Urang bedue ya disuroh raje nyuson kitab hikayat
Kek jadi bekel supaya budak-budak idup nyelamat
Peteng-peteng lah nanyan raje ade dek di alamat
Raje menjawab silakan dateng abis Isya jangen liwat

Aji Sukor kek Ayak Sulai kernguk-kerngem kenak kek inde
Paham lah urang kampong, seneng ati setempoh raje
Biase e selelap-lelap, maseng rawai kadang ngenyale
Malem  Mahat, pacak nyetel, agik untong dek dikata gile

Sampai di Sungailiat  istana raje penoh mubil
Mulai dari sidan, jip, bis, ade besak ade kecil
Aji Sukor kek Ayak Sulai diem-diem merasa kerdil
Renyek maju renyek mundur, peloh lah nak sisil  

Pas nek masok gapura, sikok nyurong sikok ngiret
Dek sadar-sadar ketiak bajuk Aji Sukor pon kantet
Diiret Ayak Sulai rupanya dek manjit ukan nak karet
Aji Sukor keliat merteng, yang sungot e mulai  meretet

Nengong nya bedue beteco, pengawal raje mendekat
Sedikit secureng ia memandang lekat-lekat
Bertanya lah ia mengapa datang tak dengan hormat
Ini istana, bukan tempat bermain silat

Ditanyak macem ya, Aji Sukor sedikit ngireng
Tangen di pinggang, yang mata e sedikit menceleng
Aji Sukor menjawab, tuan raje yang nyuroh dateng
Jangan lah engkau nek kereng-kereng

Kamen bedue ne dimintak untuk menghadap
Bales Ayak Sulai dengan suara agak mantap
Ade perintah, nulis hikayat supaya  lengkap
Titah raje ne,  jangen diabai, harep dianggap

Paduka raja tak ada di tempat
Menjawab pengawal sedikit lambat
Beliau pulang pastilah telat
Silakan pulang atau tinggalkan surat

Aji Sukor kek Ayak Sulai ngelangkah lunglai
Ati e kesel, apa yang diarep ternyata dek sampai
Yang nama e raje pacak ngumong ngakal pon lihai
Merdas ngakal rakyat, kalok bejanji  dibuat rampai. (*)

Kelekaklukok, 25082012